Aisa kya likh diya...

A Keyrun Rao original

Kuchh bhi hota rehta hai mere saath,
Sab kuchh samajh toh nahin aata hai
Kabhi garmi mein sard hote hain hum
Toh kabhi chaand bhi bhiga jaata hai

Aisa kya likh diya, main raas aa gaya
Jaane tum ne phir kya hai samajh liya
Mujhe aisa laga ke jaise tum ne aaj
Kho kar bhi mujhe hai kyon paa liya

Sawaal gehre aur jawaab khokhle hain tere
Paas nahin hai tu, isliye andhere hain sawere
Ghul bhi ja mujh mein ab, itna bhi na tarsaa
 Duur reh kar, shaamil hai khudi mein mere


Aisa kya likh diya, main tujhe raas aa gaya
Jaane tum ne phir kya hi hai samajh liya
Kabhi to aao meri khwaabon mein tum
Jaanoge ke ye jaadu tera kaise chal gaya

Dard se ek gehra rishta hai, chaahe na maano
Waqt bhi thehra hai, tum ye shaayad na jaano
Rukte hue saans lete hain, ajeeb sa hi lagta hai
Hum aaj bhi woh aashiq hain, maano na maano


Aisa kya likh diya maine, ke aaj main raas aa gaya
Jaane tum ne phir kya hai mujh ko hai samajh liya
Lamhon ke badle mein, maine toh sab hai jee liya
Sochta hoon main ke, mere saath tune ye kyon kiya?

Kyon mere paas aayaa...

A Keyrun Rao Original...

Taaron ki baraat thi hameshaa,
Baadalon ko bhi nahin bulaaya
Tanha raha hai yeh mera saaya
Har rishta humesha laga paraaya

Phir kyon mere paas hai tu aaya
Beete hue kal ki yaad hai dilaaya
Sab toh kho chuka hoon main ab
Diya toh hai, bujh chala hai saaya

Andhere rahe in raahon mein mere
Iska sach jaane ye tumse kaun kahe
Saahilon mein kyon hum doobte rahe
 Aisi maut hum kab tak kaho sahein

Kyon paas aayaa, kyon mujhe rulaaya
Ek ghoont ki pyaas ko aaj itna tarsaaya
Kyon muskuraaya, aur ye yaad dilaaya
Hum sab ko bas yun hi tumne jalaaya

Ghulam sab hain, koi ab tak hai rihaa
Bheed mein bhi jaane, sab hain tanhaa
Azaad koi nahin hai, sab yahaan ruswa
Jeene ki nayi raah aaj tu hi de dikhlaa

Lamhein aur lahoo, ab ruk hi chale hain
Tere bina ab hum kaise kaho jiye hain
Thoda chalte hain, aur kuchh rukte hain
Yeh zakhm tu jaane hum kaise sehte hain

Aur kya bikna reh gaya hai ab...

A Keyrun Rao Original

Kisine phenka sikka, koi aaj dua de gaya
Jaane kyon mera ye kissa adhoora reh gaya
Ummeed badi le kar chale they aaj hum sab
Maano ek kaala sa manhoos saaya reh gaya

Kya bikna reh gaya hai, kuchh bacha bhi nahin
Meri rooh ka khareed-daar bhi hoga yahin kahin
Sab ka daam laga dekha, kya asmaan-o-zameen
Sab sasta hi paaya, kya woh Allah, aur kya Rahim

Nange ho gaye, sabki keemat bhi laga di aaj toh
Rooh ka mol kya maangogey bataao saahebji
Pariyon ki kahaaniyon par yaqeen utna hi to hai
Kuchh pal jee lene do, marte thay kal bhi aaj bhi


Kya bikna reh gaya hai, kuchh bacha bhi nahin
Meri rooh ka khareed-daar bhi hoga yahin kahin
Chaaha tha ke mol na lag paaye meri khudi ka
Kab se marr ke bhi aaj jaane zinda hain hum yahin

Zakhm ko lahoo nahin, maathey par shikan nahin
Chaand aur taare ke baad ek nayi hi hai zameen
Kitne duur jaaoge mujhse, paaoge bas mujh ko hi[
Chaahe tum raho is jahaan mein ab kya jaane kahin


Kya bikna reh gaya hai, kuchh bacha bhi nahin
Meri rooh ka khareed-daar bhi hoga yahin kahin
Meri is muskaan ka kya bataa tu toh aaj mol dega
Is veerane mein jaan le, yeh dil hamesha dhadkega

Kyon sunein tumhaari...

A Keyrun Rao Original...

Budhaa gaye ho ab, jaane kya kehte ho
Bolna kuchh aur hai, bakte kuchh aur ho
Tumhe sun na chaahte hain, par behre hain
Aaj hum se itne duur bataao tum kyon ho

Aapka waqt aur tha, humaara daur alag hai
Kyon sunein tumhaari, falsafaa kuchh aur hai
Ab kehne sun lene ka waqt toh raha hi nahin
Aap ka kal aur tha, mera aaj kuchh ajeeb hai

Kuchh baatein samajhte hain, kayin pe gussa hue
Alag-alag rehte hain toh kya, rooh hain miley hue
Kabhi fursat mein milenge, aap se hum dil khole
Apne ho kar bhi ab kyon ham itne judaa se hue?

Paapa-mumma pukaarte rahey, tab aap kahaan they
Dhoondh rahey they khud ko, aap kyon nahin they
Aaj aapko ajeeb lag raha hai, ke phone rakh diya
Humne call kiya tha jab, aap bhi toh kahin nahin they

Budhaa gaye ho ab itne saalon mein, jaane kya kehte ho
Bolna kuchh aur hai, bakte toh tum kuchh aur hi ho
Sunte hain dhadkanein tumhaari, ye sach hai to magar
Ek salaam par tumhaari ek dua to humein naseeb ho... 

Paak mohabbat baaqi hai kya?

A Keyrun Rao Original

Sab kuchh toh maila sa lagta hai, saaf bataao hai kya?
Khuda pe sawaal uth chaley hain, baaqi raha hai kya?
Tumse mil kar laga tha ki rooh humaari dhul gayi hai aaj
 Sawaalon-jawaabon mein paaya, mujhe chaahti hai kya?

Paak mohabbat aaj baaqi hai kya? Mujhe toh nahin lagta
Bataa tujh mein mera aks, aur mujh mein teri rooh kaise
Aaj chaah-kar bhi ye bataa kyon nahin hai kisi ko dikhta
Maut ka saaya hai, nayi dastaan aaj tu kyon nahin likhta

Tera kuchh reh gaya hain mere paas mein, tu dekh bhi le
Aur gehra ho sakta tha ye, kuchh pal aur ye tu soch bhi le
Nigaahein gehri lagi thi teri, kuchh bhi keh ke bana mujhe
Ek nayi rasam hai duniya ki, ye aaj tu bhi mujh se seekh le

Paak mohabbat aaj baaqi hai kya? Mujhe toh nahin lagta
Bataa tujh mein mera aks, aur mujh mein teri rooh kaise
Is masoom shaam ko tu bhi bataa bas kaise hai dekhta
Dekhne ki baat toh ye hai, kaise hai tera khuda jhoomta

Paak to kuchh bhi raha nahin magar, tere bina mujhko
Sooni si kyon lagey hai, mohabbat ki har woh dagar
Allah ke paas fursat aaj zyaada to bachi hi nahin hai
Khuda ka bhi pata nahin, kaisi raah dikhaayega tujhko

Afsos ki baat hai yeh...

A Keyrun Rao Original...

Izzatein lut jaati hain, kiraane ki dukaan par
Kisiko toh aaj hi udhaar waapas chaahiye,
Koi hai taiyaar, ghar aakar wasool karne ko
Koi rok leta hai humein jhopdi ki hi raah par

Afsos ki baat hai yeh, ke aaj bhi zinda hain
Kab ke marr chuke they, dafan ho gaye they
Galti jaane kya hui humse, koi toh bata do ab
Hum toh aaj bhi bas utne hi sharminda hain

Ek kahaani thi humaare paas, kaise bhi keh dete
Kuchh aansoo bahaate, thoda sa hum seh bhi lete
Kabhi toh tum pari thi, aaj baat kuchh badli hui hai
Thodi khushiyaan tumse paate, gham bhi aaj seh lete

Afsos ki baat hai yeh...ke tum khush ho jaane kahin
Hum tumko dhoondh rahe hain aaj bhi yahin kahin
Tumne toh khuda paa liya, hum aaj bhi khojte hain
Aasmaan tak jaayein, ya phir khod le banjar zameen

Ek sher tum padho, ek main bhi suna hi deta hoon
Akele hain hum, khabar yeh toh hai mujhko bhi
Thoda tum ji lo, apni yeh raahein aaj suljha bhi lo
Ek baar yun milo mujhse, karo jo main chahoon


Afsos ki baat hai yeh...ke hum aaj bhi lagey paraaye
Dhadakte toh sang hain, par duur hi hain yeh saaye
Kuchh kadam ab tum chalo, aur kuchh hum badhein
Kaise bhi padh lo isey, humein saath mein kaun laaye

Guwahati...

A Keyrun Rao Original

Ghinn aati hai, khud se
aur is desh se bhi aaj to,
Sab ki toh lut gayi izzat,
Kaise chalein shaan se?

Main jaanta nahin usey,
Kabhi dekha bhi nahin
Us dard ko jaana maine
Humaari hai, koi aur nahin

Jaanwar ho chale hain ab
Bas bhook-pyaas rehti hai
Rooh ko dakaar jaayein ab
Insaaniyat udaas rehti hai


Ghinn aati hai, khud se
aur is desh se bhi aaj to,
Yehi reh gaya hai kyon
koi to aaj hi jawaab do 


Haddi-boti ke is hod mein
Kahin toh ek maseeha ho
Koi usool ya koi kanoon ho
Kaise rahoon jallaadon mein

Rooh bik chuki hai is kadar
Khwaabon ke hisaab dete hain
Mushkil si dikhti hai ye dagar
Kain kos hum aaj bhi chalte hain


Ghinn aati hai, khud se
aur is desh se bhi aaj to,
Radha ki kya kahoon aaj
Meera se sabki phati hai

(A humble dedication to all men... bastards, some idiot called them the weaker sex. Quit antagonizing them ladies, it will all come back right at you...)

Kab tak chamkega taara...

A Keyrun Rao original, dedicated to Rajesh Khanna saahab. May his soul rest in peace.

Kabhi socha hai yeh ke do suraj aur chaand hote agar
Kiski chamak ko maante, kiski keemat hum pehchaante
Taare bahut dikhte hain, sabse chamkeela suraj hai magar
Ek aur hota samjho, uski kadar kya kabhi bhi tum jaante?

Suraj ne pata nahin kitne taaron ko kya jaane maara hoga
Chalaak tha woh, roshni ki hi toh baat thi unke beech mein
Suraj aur sitaaron mein duuriyaan utni bhi toh nahin thi na
Taaron ka darr suraj ke dil mein bhi kahin tab raha toh hoga

Bahut din jalaa suraj, par raat ko toh chamakta taara hi tha
Samajh nahin paaya bechaara, jalta raha din-ba-din woh
Andhere ke baad ka baadshah woh chaah kar hai nahin
Bujh jaane ke baad riyasat jalte hue chaand taaron ka tha

Bada guroor tha suraj ko, ke chaand ki bhi wo jagah le lega
Itna chamkega, ke din aur raat par akele hi woh raaj karega
Nadaan tha, samajh nahin paaya ke, tim-timaate taaron ki
Baadalon mein jagah woh akela hi kaise yun bhar sakega


Kabhi socha hai yeh ke do suraj aur chaand hote agar
Kiski chamak ko maante, kiski keemat hum pehchaante
Kaka ek akele hi they, aur hamesha ke liye woh rahengey
Bina unki muskaan ke, kuchh meel hum chal bhi lenge...

Dagar andheri hogi, chamak jaane kahaan chhupi hogi
Woh adaa woh muskaan saath na bhi rahi toh bolo kya
Chalenge hum bhi, rukenge nahin, chaahe jo bhi baat ho
Unke jaise thaay haalaat, kya ab humaari bhi aisi hi hogi?

Kameez poori geeli hai...

A Keyrun Rao Original

Aaj toh kameez poori geeli hai
Aur aankhein bhi zaraa nam hain
Tujh se juda ho kar phir kyon
Aaj kuchh aisa ajab aalam hai

Ek baar royi thi meri kameez par
Aaj wahaan gehhra ek zakham hai
Saath chale hum, kya thi wo dagar
Ab wahaan main aur ye tanhaayi hai

Kameez dhul gayi, daag bhi mit gaye
Tere saaye ke nishaan, kaise reh gaye
Rooh yeh humaari tarasti rahi aaj bhi
Hum ek ganda mazaak banke reh gaye


Aaj toh kameez bhi poori geeli hai
Aur aankhein bhi zaraa nam hain
Lahoo bahaa jahaan zakhm kam hai
Tere bin aaj bhi adhoore hum hain

Poore nahin hue, sab adhoora hi lagey
Jab dekha hum aaj phir hum akele jagey
Kuchh duaein, thodi meethi baatein suni
Ab kaun hain paraaye, aur kaun sagey?

Bheeg kar aaj bada hi mujhe achchaa laga,    
Jaise phir sadiyon ki neend ke baad jagaa
Duur hai bahut mujhse aaj kahin tu kahin
Phir kyon mujhe dhadkan ke kareeb laga?

Aaj toh kameez bhi poori geeli hai
Aur aankhein bhi zaraa nam hain
Neend kam aur khwaab zyaada hain
Chal rahi saansein aur ye dhadkan hai...

Bheed badh gayi hai...

A Keyrun Rao Original

Kuchh aur hi tha yeh shehar, log kam aur khwab zyaada
Waqt badal gaya, aur pakka hi ho chala sab ka iraada
Koi jism bechta hai, kuchh ki toh rooh girwi hai yahaan
Samajh nahin aata ab, kaun baadshah hai kaun piyaada

Bheed badh gayi hai yahaan, koi khaali jagah hai kahaan?
Kisine mandir banaaya, koi masjid peechhe chhod gaya
Us se milne ke raaste itne, phir bhi bahut waqt lag gaya
Saaye nahin dikhte hain aaj-kal, kya ho raha hai yahaan?

Dost mil jaate hain aksar, khud toh kahin kho chuke hain
Is shor mein sach kahein toh, hum behre hi ho chale hain
Pata nahin kab suney apni dhadkan, usey mehsoos kiya ho
Badi si is bheed mein, ab hum bhi shaamil ho chale hain

Kuchh khwaab le kar aaye, kuchley dekhey apne hi saaye
Aansoo nikal to rahe magar, ponchhne ka waqt kaise laaye
Kuchh rishte ban bhi gaye, phir kyon jald hi hue paraaye
Jo samjha hai is dard ko, aaj bas wo hi humein samjhaaye


Bheed badh gayi hai yahaan, koi khaali jagah hai kahaan?
Kisine dukaan lagaayi, kuchh logon ne bhookh mitaayi
Bade-badon ne rutba kamaaya, kuchh ne pyaas bujhaayi
Jee lete hain baaqi sab, kuchh ajeeb sa hi hai apna jahaan

Waqt nahin hai kisi ke paas, na hai ishq ka koi bhi jazba
Jeene-marne ki dhun mein, laga hua hai apna yeh kasba
Ab apne saayon pe mat chalo, kisi ko yun bhi na kuchlo
Aane waali nasl ko chalo dein koi naya achcha sa tajurba

Ek bagal mein...

Just another try, apologies to Mr Piyush Mishra!

Ek bagal mein maut hogi, doosri mein dhadkanein
Rooh jalti hai aksar, Kaisi teri bataa hai silwatein
Ek bagal mein chhanv hogi, doosri mein karwatein
Lahu khaul chuka hai, jaane kaisi hain yeh khabrein

Ek bagal mein saans hogi, doosri mein hain mehfilein
Khush hain tanha hum, ya raas hai aayin dhadkanein
Kuchh samajh nahin aata, sab theek ho chala hai ya
Kuchh toh baaqi reh gayi hain apni saari  ranjishein

Ek bagal mein haan bhi hogi, doosri mein nafratein
Koi padhega Quran, kuchh keh laayenge qafirein
Koi ek toh so jaayega aaj maut ki hi neend mein ab
Kuchh toh aaj phir bhi dhoondha karenge saazishein

Ek bagal mein chaand hoga, doosri mein parchhaiyaan
Yaad aati hain mujh ko, ab bhi teri woh naadaniyaan
Thoda kuchh tu nikhre, kuchh main bhi aaj chamkoon
Rahengi adhoori phir bhi, shaayad apni yeh kahaaniyaan

Ek bagal mein kuchh dard hoga, doosri mein tanhaiyaan
Itne gehre doobenge hum, yeh kaisi teri hain gehraiyaan
Aaj mujhko jee lene de, thoda sun bhi lene dein aaj tujhe
Yun lagta hai jaise, mit gayin meri toh rooh ki gehraaiyaan

Ek bagal mein...

A humble, yet bastardized version of Piyush Mihraji's masterpiece for Anurag Kashyap's Gangs Of Wasseypur!!! Apologies in place...

Ek bagal mein daaru hogi, duusre mein yaariyaan
Paas mein sutta bhi hoga, aur khoob hongi botiyaan
Talli ho kar maangengey jab muft mein yun rotiyaan
Kahega waiter bhi, khaao mere maalik ki jootiyaan

Hum bewdon ki kismat mein rahengi badi gaaliyaan
Koi hansega kahin khul kar, koi kahega shayariyaan
Jaisi ho marzi khuda ki, roothengi duniya-daariyaan
Beech mein toh hain hi yeh ajab-ghazab kilkaariyaan

Koi hairaan khud se hai, koi toh aaj bekhud bhi hai
Kisine aaj khud ko khoya, koi shaayad mehfil mein hai
Aaj ki baat rehne do, sab hi toh ab nashe mein hain
Koi bakwaas kar raha hai, koi kyon sannaate mein hai

Ek shiqaayat kar raha hai, ke gair ki baahon mein hai
Koi kehta hai yeh ke woh kuchh zyaada nashe mein hai
Hum to peekar yeh hain samjhe, ke sab hi chutiye hain
Ek hi gyaani hai yahaan, jo phir bhi hosh mein kyon hai

Ek bagal mein daaru hogi, duusre mein yaariyaan
Paas mein sutta bhi hoga, aur khoob hongi botiyaan
Noch lo haddi aur boti, kaho tumhaari kahaaniyaan
Hansega hum par, jo dekh paayega ye nishaaniyaan

Yeh khayaal aaya hai...

A Keyrun Rao original

Koi shor toh nahin, na koi baat hai,
Ek ajnabi se aaj meri mulaqaat hai,
Teri dhadkan suni, muskaan padhi,
Lagta hai jaise aaj hi jumme raat hai.

Yeh khayaal hai, manzilein juda hain,
Saahil par jo mil bhi jaayein to kya hai,
Kuchh shaamein aur yeh thodi raat hai
Jawaab itne saare, kuchh sawalaat hain.

Aaj hum bhi jiyein, tum zaraa muskura do
Jannaton jaisi koi meethi si apni baat ho,
Raat toh dhal jaayegi, yun hi phir bin tere
Meri us sawaal ka aaj toh tum jawab do.

Yeh khayaal hai, ke tu kuchh aur hi hai,
Sawaalon mein chhupa mera jawaab hai,
Mil ja kuchh aise, mujh mein tu is tarah,
Jaise toofaani sa koi sarfira sailaab hai

Chal bikharte hain, aaj phir se milte hain,
Yun mil ja mujhe, jab taare chamakte hain,
Aaj teri yeh kahaani main bhi toh sun loon,
Dard ke kuchh panne chal saath padhte hain

Yeh khayaal aaya, apne zakhm bhi gahre hain
Na toh tum aaj akeli ho, na hum bhi sehme hain
Baras ja aaj kuchh is tarah, tu meri khudi mein,
Na tu tanha hai, na toh hum bhi aaj akele hain....

Kahaaniyaan hain kuchh...

A Keyrun Rao Original

Dher lagi padi hai kahaaniyon ki
Kuchh suney, thodey unkahey bhi
Kisi mein khushi hai, thode aansoo
Koi kahey ishq ki, koi ek maut ki,


Kahaaniyaan hain kuchh, ajeeb sey
Kab kahoon, poochh loon naseeb se


Aashiqui kyon aaj ek si nahin hoti
Ek sharaab mein hai ab dooba hua,
Woh jaane aaj bhi kyon nahin roti
Khwaab hai, par chain se nahin soti


Kahaaniyaan hain kuchh, ajeeb se
Kaise kahoon, poochh loon rab se

Sab badal raha hai, pehchaane kaise?
Us muskan mein itni salwatein hain ab
Rooh marr chala hai, itna ghayal hai
Bas ab marham ki talaash hai besabab

Kahaaniyaan hain kuchh, ajeeb se
Kab kahoon, poochh loon naseeb se

Ghaanv taaza hai, lahoo kab sookhey?
Itna bata bas kaise ab tujhe bhoolein
Har pal yaad hai, teri wo saari baatein
Chali ja kahin ab, sooni kar de raatein!

Kahaaniyaan hain kuchh, ajeeb se
Kab kahoon, poochh loon aaj sab se...

Kuchh aur hi baat hai...

A Keyrun Rao Original

Kisi ko pari lagey, koi kahey Khuda ki inaayat,
Main kya kahoon usey, mujhe toh lagey ibaadat,
Ek khwaab hai bas, jo kabhi dekha bhi nahin tha,
Sab us Rab ki hai mere liye, bas ek badi si inaayat.

Kisine jannat dhoondha, kisine saara jahaan paaya,
Har koi apne hisse mein, jaane kaisi duayein laaya,
Maine to bas hai tujhe dekha, aur hai tujhe chaaha
Teri roshni mein dooba, yeh tu mujhe kahaan le aaya.

Kaun jaanta hai yeh ke Khuda bhi yahin basta hai
Maan le tu bhi ki tera aur mera ek hi sa rasta hai,
Kuchh kadam toh chal ke dekh mere saath bhi tu,
Kuchh alag saawan is gali mein bhi toh barasta hai.

Main dhoop sahi, tu chaanv hai ye maine maana hai,
Apna jo yeh naat hai jaan meri, bahut hi puraana hai,
Mandir toote, naye masjid bhi aaj hi toh gaye hain,
Badan se saaye ka yeh rishta bhi yun hi nibhaana hai!

Kuchh aur baat hai, tu mujh mein jhaank kar toh dekh,
Kuchh pal ko soch, ye raasta bhi toh hai kitna nek,
Kuchh kadam tu chal, thode faasle main taiy karoon
Bas rehne bhi de bas is duniya ka jo bhi ho koi take

Mil bhi jaa bas mujh mein tu, kuchh pal aur thehar ja
Ek naya sa jahaan chal mil kar aaj hum basaate hain
Kahin duur na chali jaana tum, samjho mujh ko bhi
Neele aasmaan taley, ek pyaara sa ghar basaate hain!

Dude, say this to bhaabhijaan, jald-se-jald!!!

Mausmi si tabiyat...

A Keyrun Rao Original

Miley kabhi hum pyaar se, kabhi socha hai aetbaar se
Duur kyon hain pata nahin, dhoondha tujhe tha pyaar se
Raaste toh alag hi rahey hain, jab muda tha raah mein
Tere saaye ko maine maanga, kya jaane kitne qaraar se

Mausmi si tabiyat; parbaton si mushkil rahi meri raahein
Gar tu jo mil jaaye humein, phir tham jaayein yeh aahein
Kuchh der toh hum bhi rukein, thoda tum bhi tham jaao
Jaanein kis ke liye hain hum, khol kar baithe apni baahein

Meri thodi khushi tum jee lo, bahaao aansoo, kuchh hans lo
Aansuon ka kya hai bolo, main ro loon, thoda tum hi hans lo
Aage ki kahaani jaane hai kya, saaara kuchh dhundhla sa hai
Thoda sa main aur jee loon, aur thoda sa tum bhi aaj hans lo


Mausmi si tabiyat; parbaton si mushkil rahi meri raahein
Gar tu jo mil jaaye humein, phir tham jaayein yeh aahein
Kuchh theek hain, thode se hain khafaa, tum bataa do
Kaisi hain ye manzilein humaari bhi is qadar bhi  bewfaa

Kuchh aur pal chal ke bhi dekho yun saath humaare
Chaand aur suraj nahin rehte jaane kyon paas humaare
Aapka chaand shaayad aapka hai jaane kyon shaayad
Kuchh toh mere khwaab aaj bhi rahenge humaare re hi