Raat ka burkha odh kar...

A Keyrun Rao Original

Chehre to din mein bhi anjaane hain
Ujaalon ka ab kuchh nahin hai asar
Taaron ki roshni mein jaane kya baat hai

Badi saaf dikhaayi deti hai yeh dagar

Raat ka burkha odh kar chali to thi woh
Jaane kyon nahin bani woh meri humsafar

Saaye pehan bhi lo, rooh to dikhti hi hai

Kuchh bhi tum kaho, fiza toh mehakti hai
Is kadar shaamil ho tum meri zindagi mein

Dhadkan meri jaane yun kaise thirakti hai

Raat ka burkha odh kar chali to thi woh
Jaane kyon na hua uspe mera koi bhi asar

Anjaan hain tumse, to kya hua ye bataa
Maaf kar de, chhoti si to thi meri khataa
Khushboo si rehti ho ab meri saanson mein
Kaise hua yeh, bataa kya hai tujhe ye pataa

Raat ka burkha odh kar chali to thi woh
Jaane kyon rahi mere ishq se yun bekhabar

Kitna dhoondha tumhe, ab toh hadd hai\

Tera-mera phir milna, kya jaane ye kab hai

Intezaar mein rehte hain, yun subah-shaam
Maekash ko tarasta ho jaise koi jaam

Raat ka burkha odh kar chali to thi woh
Jaane kyon ruki thi hoke yun besabar

Ek nayi si dhun baji

A Keyrun Rao Original

Kuchh to baat hai us mein
Ajanbi ho kar bhi nahin lagti
Dil ke kareeb rehti hai wo
Ek pyaare dost si hai lagti

Yun to bahut miley haseen
Kisi ke saath mera nahin scene
Maahi maahi keh pada ye dil
Kaise bani mere sapnon ki queen

Ek nayi si dhun baji seene mein
Kuchh ajeeb uchhaal bhi thi
Mere in tanha kadmon mein
Mazaa aaya tujhse milne mein

Kuchh baat to khaas hai tujh mein
Aise pehle to nahin muskaaya main
Jaane kiski yaad dilaayi hai tu ne
Phir laga main hoon maikhaane main

Ek nayi si dhun baji aaj seene mein
Alfaaz jaane kab mujhe milenge
Shayari to kehna chaahta hoon par
'Irshaad' kehne waale kahaan milenge

Saare shehar ke chehron mein
Jaane kyun teri hi adaa yaad hai
Ek nayi dhun suni dhadkan ne
Kya phir mujhe pyaar hone ko hai?

Khoob ishq naseeb hua...

A Keyrun Rao Original

Ek tere siwa sabne chaaha humein
Aisa mujh mein kya dikhaayi diya
Jo tujhe kabhi nazar mein hi na aaya
Ye sochte hue guzarte hain lamhein

Kuchh bhi to nahin badlaa idhar
Jaane tu kyon rahi hai bekhabar
Teri khamoshiyon ki talaash mein
Aaj bhi hoon main bin humsafar

Khoob ishq naseeb hua tere baad
Phir bhi hamesha mujhe bas teri yaad

Muskaan se mehroom kyon rahoon
Kya phir se main mohabbat kar loon
Tere bina ye saalon se bade lamhe
Tu hi bataa main kis tarah katoon

Tujhe paane ki ummeed aaj bhi hai
Tujhse mujhe pyaar aaj utna hi hai
Jald hi mujhse kahin takra jaao
Tere ishq ki mujhe tishnagi hai

Khoob ishq naseeb hua tere baad
Phir bhi hamesha mujhe bas teri yaad

Woh zamaana aur tha...

A Keyrun Rao Original

Chaand, taare, saara aasmaan,
Jaise kadmon mein paaya ho
Sajde mein sar jhukaaye yun
Paaya ho saara yeh jahaan

Woh zamaana yaari ka aur tha
Woh fasaana kuchh aur hi tha

Waadon pe tere yaqeen kiya
Teri yaadon mein is qadar jiya
Apni rooh ko maine tera kiya
Bas tera saaya talaash kiya

Woh zamaana ishq ka aur tha
Dil ka behalna kuchh aur hi tha

Teri muskaan mein baat aur thi
Humaari raahein kuchh aur hi thi
Duur tak saath chalna tha magar
Shaayad manzil kuchh aur hi thi

Woh taraana labon pe aur hi tha
Tera yaad aana bhi kuchh aur tha

Ek khushboo pehchaani si...

Ek ajnabi se takra kar
Uski pehchaan kahin
Dil mein yun chhap jaaye
Aisi ek dua hai jo
Yunhi aapko mil jaaye

Ek khushboo pehchaani si
Gar jo dil mein bas jaaye

Ek muskaan dekh kar
Uski khushi kahin
Tumhe jo behlaaye
Aisi ek noor ho wo
Andhere bhi chamkaa jaaye 

Ek khushboo pehchaani si
Jo dhadkan mein utar jaaye

Ek baadal jab baras kar
Tumhe poora bhigaaye
Neend se aise jagaaye
Apne maasomiyat se
Tumhe yun gud-gudaaye

Ek khushboo pehchaani si
Jo saanson mein bhar jaaye

(Dedicated to my sis Mahera Rehman aka @Maahi_Ve)

Aisi dua kisey naseeb hai...

A Keyrun Rao Original

Maut tak jis ka intezaar rahey
Aisa to kam hi hota hai doston
Maut ke baad bhi taraste hain
Marr ke jeete hain wo barson

Aisi dua kisey naseeb hai
Ke itni mohabbat paate hain

Chot khaate hain chalte hue
Mazjid ki raah par bhi kabhi
Jahannum ki raah mein mere
Makhmal tune hai bichha di

Aisi dua kisey naseeb hai
Jo itni inaayatein paate hain

Wo khushi hai hi badi alag
Jo tujhse maine hai paayi
Faqir ke naseeb ka sikka
Mere jholi mein jo gir aayi

Aisi dua kisey naseeb hai
Kya deewaana badnaseeb hai

Kitni galtiyaan hoti hain yun
Sabki sazaa maut to nahin
Meri bewafaai ka sila
Mera akelapan hi to nahin

Aisi dua kisey naseeb hai
Tu aaj bhi mere kareeb hai

Dedicated to @TheMasakkali aka Lata Singh!

Hum ishq mohabbat ke...

A Keyrun Rao Original

Kuchh nahin jahaan ki daulat
Kuchh zyaada mili bhi nahin
Ek khazaana liye firta hoon
Noor kabhi khatm hota nahin

Hum ishq mohabbat ke raahi
Kuchh aur jaante bhi nahin

Uski khushi pe jahaan luta dein
Uske chehre ko chaand maan lein
Baawri si hi baatein hain apni
Ab tumse hum kya kahein

Hum ishq mohabbat waale
Dar-ba-dar hain hum yahin

Kabhi dua kabhi to sazaa si
Dhadkanein yun chalti rahein
Jis din sab tham jaayega tab
Tujh mein mil jayenge kahin

Hum ishq mohabbat ke pyaase
Tere bin dariya sookhi zameen