Bas ek tu hi tu...

A Keyrun Rao original, inspired from the track of 'Nautanki Saala'

Ek naya rang dekha hai tujh mein
Bas tu hi hai kyon hai mujh mein
Sab nazaare kho gaye hain kahin
Tere bina ab main nahin mujh mein

Nayi raah dekhi hai maine tere sang
Zindagi yeh nahin lagti hai koi jung
Sab meetha-pyaara lagta hai mujhko
Jab bhi paata hoon tujhe mere sang

Bas ek tu hi tu hamesha rehta hai
Jaane mujhse kitni baatein kehta hai
Kuchh pal ko ruk ke jaan lete hain
Teri dhadkan, mera dil jo kehta hai

Khwaab toh duur ki baat hai yaar mere
Mujhko toh ab neend bhi nahin aati hai
Bina tere akele is jahaan mein kaise
Mujhe ek anjaani si pyaas sataati hai

Sharaabi se jaise uska nasha chhin gaya
Tere bina mein waise tadapta reh gaya
Mil ja mujhko badaalon ke paar kahin
Is saal phir mera jahaan sookha reh gaya


Bas ek tu hi tu hamesha rehta hai
Jaane mujhse kitni baatein kehta hai

Ab ke aao toh jaane nahin doonga
Itna bhi pyaar kisiko koi karta hai...?

Badi duur hai tu

A Keyrun Rao original

Kuchh kehna hai tere kaanon mein
Chali gayi tu kahaan jahaanon mein
Badi duur hai tu, dikhti nahin hai ab
Mil bhi ja kahin, meri raahon mein

Sunaayi nahin deti hai, kya karoon
Dikhaayi nahin deti hai, jaane kyon
Yaad karta hoon tujhe main har pal
Bina tere bata main ab kaise rahoon

Kyon hai duur tu itni, kya pata mujhe
Kya gila hai tujhko, na hai pata mujhe
Jhaank le aa kar tu ab dil mein mere
Jaane itna main chaahoon kyon tujhe

Kuchh kehna hai tere kaanon mein
Chali gayi tu kahaan jahaanon mein
Bada tanha sa lag raha hai sab kuchh
Bas tu hi jawaab hai sawaalon mein

Badi duur hai tu, jaane kahaan hai
Mera yeh jahaan tera, aaj soona hai
Mil ja mujhko hans kar phir se waise
Jannat apna toh bas ab yahaan hai